Úlfljótsvatn

Vatnið er kennt við Úlfljót sem sagður er fyrsti lögsögumaður Íslendinga. Við hann voru Úlfljótslög kennd en þau voru fyrstu almennu lögin sem giltu hér á landi.

Sogið fellur gegnum Úlfljótsvatn sem er um 4 ferkílómetrar að stærð og stækkaði þegar Ljósafossstöð var tekin í notkun árið 1937 en samkvæmt lögum frá Alþingi 1933 hafði Reykjavíkurbær sérleyfi til að virkja Sogið. Sogsvirkjun var þá stofnuð sem sérstakt fyrirtæki í eigu bæjarins en íslenska ríkið varð meðeigandi borgarinnar árið 1949 og átti helming í fyrirtækinu á móti Reykjavíkurborg til ársins 1966 þegar Sogsstöðvarnar voru lagðar til Landsvirkjunar.

Skógræktarfélag Íslands, Bandalag íslenskra skáta og Skátasamband Reykjavíkur keyptu jörðina, að jarðhita undanskildum, af Orkuveitu Reykjavíkur árið 2011.