Öskjuhlíð

Öskjuhlíðin hefur fest sig í sessi sem eitt vinsælasta útivistarsvæði Reykvíkinga.  Í Öskjuhlíð er net hjóla- og göngustíga og þá hefur skógrækt verið sinnt af kappi, en þar hafa tæplega 200.000 tré verið gróðursett.  Þar eru einnig merkilegar jarðfræðilegar og sögulegar minjar.  Veitinga- og útsýnisstaðurinn Perlan er samgróinn ímynd borgarinnar. 

Hitaveitutankarnir voru reistir árið 1940 gegndu lykilhlutverki í að miðla heitu vatni til Reykvíkinga.  Í Öskjuhlíð er hverinn Strókur sem útbúinn var til skemmtunar og fræðslu um virkni goshvera.  Hann gýs alla daga milli kl. 13:00 og 17:00 frá 15. maí til 15. september, nema í verulega hvössum suðlægum áttum, svo að strókurinn berist ekki á Perluna.