Athafnasvæði Orkuveitunnar við Hellisheiði. Mosagróið basalthraun í forgrunni og í fjarska sjást fjöll sem hafa myndast í eldgosi undir jökli og eru að megninu úr basaltgleri.
Kalsít (CaCO3) er að formi til ein fjölbreyttasta steindin sem fyrirfinnst á jörðinni. Sum afbrigði af kalsíti eru með þunna plötulaga kristalla sem standa óreglulega á rönd og eru algeng í fornum megineldstöðvum.
Hópur af öflugum tæknimönnum hjá Orkuveitu Reykjavíkur hefur komið að undirbúningi og uppsetningu búnaðar vegna niðurdælingar á koltvísýringi í Svínahrauni og Þrengslum.
Mikilvægt er að standa vel að vöktun á áhrifum niðurdælingar á koltvísýringi bæði neðanjarðar og á yfirborði.
CarbFix verkefninu var formlega hleypt af stokkunum í september 2007 í Hellisheiðarvirkjun. Við það tækifæri hélt forseti Íslands Ólafur Ragnar Grímsson ræðu þar sem hann benti á mikilvægi rannsókna á loftslagsbreytingum og hvernig stemma megi stigum við þeim.
Ráðinn hefur verið hópur doktorsnema sem vinna að verkefnum sem eiga m.a. að varpa ljósi á hraða þeirra efnahvarfa sem eiga sér stað í berggrunninum þegar koltvísýringi er dælt niður í hann. Þannig verða til svör við því hversu langan tíma og við hvaða aðstæður koltvísýringurinn binst basalti. Verkefnið mun því geta af sér mannskap sem hefur þekkingu til að bera til að nýta niðurstöður rannsóknarinnar til framtíðar.
Vísindamenn frá Háskóla Íslands, Kólumbía háskóla í New York, Rannsóknarráði Frakklands í Toulouse og Orkuveitu Reykjavíkur við niðurdælingarholuna HN-2 í Svínahrauni í júní 2008
Orkuveita Reykjavíkur hefur reist Hellisheiðarvirkjun til rafmagns- og heitavatnsframleiðslu og nýtir þannig gufu og heitt vatn á sunnanverðu Hengilssvæðinu í Sveitarfélaginu Ölfusi. Á athafnasvæði Orkuveitunnar í Svínahrauni og Þrengslum hefur verið búið svo um hnútana að vísindamenn geta nú fært rannsóknir sínar úr rannsóknastofum út í náttúruna og sannrænt þær þar.
Helsta markmið CarbFix verkefnisins er að líkja eftir og hvetja þá náttúrulegu ferla sem binda koltvísýring á jarðhitasvæðum. Stefnt er að því að sýna fram á að unnt sé að reisa jarðvarmavirkjanir sem losi nær engan koltvísýring og að jafnvel sé mögulegt að binda stóran hluta þess koltvísýrings sem losnar frá Íslendingum á öruggan hátt.