Neysluvatn
Orkuveita Reykjavíkur hefur látið framleiða úti- og innivatnspósta (drykkjarfonta) til að stuðla að auknu aðgengi almennings að kalda vatninu. Innivatnspóstarnir hafa verið settir upp í leikskólum, skólum, íþróttahúsum og öðrum stofnunum og útivatnspóstarnir t.d. við göngu- og skokkleiðir í Reykjavík
Vatnsveita Reykjavíkur var fyrsta vatnsveita á Norðurlöndunum með ISO 9001 vottað gæðakerfi.
Fylgst er með mengun á vatnsverndarsvæðum Orkuveitunnar og komið í veg fyrir hana með fyrirbyggjandi aðgerðum. Dæmi um fyrirbyggjandi aðgerðir eru að takmarka umferð um svæðin, hafa eftirlit með meindýrum og banna notkun eiturefna innan svæðanna.
Nýting vatns í Reykjavík er mun betri en áður vegna markvissrar lekaleitar starfsmanna Orkuveitunnar og viðgerða og endurbóta á vatnslögnum.
Strangar kröfur eru gerðar um alla umgengni á vatnsverndarsvæðum OR og hvernig bregðast á við mengunaróhöppum.
Mengunarvarnasett eru höfð þar sem sértakar varúðar er þörf s.s. á vatnsverndarsvæðum. Í slíkum settum eru m.a. ígleypimottur og tuskur fyrir olíur, sýrur og önnur varasöm efni.
Harka vatns er magn af kalsíum og magnesíum í vatni og er mæld í þýskri hörkueiningu (°1dH). Formúlan er eftirfarandi:
°1dH=(Ca(mg/l)x2,497+Mg(mg/l)x4,116)/17,9
Skalinn er gróflega eftirfarandi:
0-4°dh = mjög mjúkt
4-8°dh = mjúkt
8-12°dh = aðeins hart
12-18°dh = nokkuð hart
18-30°dh = hart
>30°dh = mjög hart
Íslenskt vatn er undir 2 og á Reykjavíkursvæðinu er það 0,2 til 0,60 °dh eða sérstaklega mjúkt. Ekki á að þurfa nein mýkingarefni eða kalkhreinsi eða sölt í þvotta/uppvöskunarvélar á Íslandi
Heitt vatn
Með virkjun jarðvarma til hitaveitu sparast dýrt jarðefnaeldsneyti, olía eða kol, til brennslu vegna húshitunar. Einnig sparast jarðefnaeldsneyti til framleiðslu á rafmagni.
Ef hita þyrfti sama svæði og gert er með hitaveitu á höfuðborgarsvæðinu, þyrfti til þess um 560 þús. tonn af kolum eða 360 þús. tonn af olíu á ári. Kostnaður við það næmi um 15-20 milljörðum króna árlega.
Á veturna geta einstaklingar og fyrirtæki notað affallsvatn til þess að bræða snjó á flötum sem eru um 20-25m2. Fyrir stærri fleti þarf að blanda skerpingu frá framrennsli við affallsvatnið til þess að hita það upp.
Heitt vatn er notað til þess a hita upp götur, t.d. í Grafarholti og í Fossvogi
Orkuveitan niðurgreiðir vatn til sundlauganna í Reykjavík. (C.a. 50% af taxta til heimilisnota)
Sem mótvægisaðgerð við að láta borholur blása er jarðhitavatni skilað aftur niður í jarðhitageymi.
Orkuveitan gefur út bæklinga til þess að fræða almenning um hvernig megi nýta heitt vatn betur.
Rafmagn
Starfsmenn Rafmagnsveitu Reykjavíkur hófu undir forystu Steingríms Jónssonar rafmagnsstjóra skógrækt í Elliðaárhólma. Elliðaárhólminn er í dag einaf útivistarperlum Reykjavíkur.
Með virkjun jarðvarma til framleiðslu á rafmagni sparast jarðefnaeldsneyti til framleiðslu á rafmagni.
Allt dreifikerfi rafmagnsveitu er neðanjarðar og er því ekki sjónmengun eins og víða erlendis
Reykjavík er talin með best upplýstu borgum heims sem skapar öryggi meðal borgaranna.
Andrúmsloft
Orkuveitan tekur þátt í tilraunum með losun á CO2 sem verður til við framleiðsluna, þar sem reynt er að binda koltvísýring í basalti í jarðvegi svo að til verður kalsít (kalsíum karbónat).
Orkuveitan styrkir skógrækt í Skólaskógum, Bernskuskógi, Straumnesi við Úlfljótsvatn og á fleiri stöðvum. Með skógræktinni leggur Orkuveitan sitt af mörkum til þess að binda CO2 í andrúmsloftinu og hjálpar til við að koma í veg fyrir gróðurhúsaáhrifin.
Orkuveita Reykjavíkur er hluthafi í Vistorku ehf., sem er eigandi Íslenskrar NýOrku. Íslensk NýOrka opnaði fyrstu stöðina í heiminum sem ætluð er til sölu vetnis beint til almennings. Eitt af markmiðum fyrirtækisins er að stofna vetnissamfélag á Íslandi. NýOrka var framkvæmdaraðili ECTOS verkefnisins þar sem gerð er tilraun með akstur strætisvagna í Reykjavík, sem eru knúnir rafmagni framleitt úr vetnissellum.
Með notkun hitaveitu í stað olíu til húshitunar er losun mengandi efna í andrúmsloftið hverfandi lítil.
Notkun hitaveitu í stað olíu dregur verulega úr losun koldíoxíðs sem veldur gróðurhúsaáhrifum.
Vegna notkunar heita vatnsins sparast flutningur á jarðefnaeldsneyti til landsins sem jafnframt minnkar CO2.
Landssvæði
Á virkjunarsvæðum OR á Hellisheiði er Innstadal, Miðdal og Skarðsmýri hlíft með því að staðsetja borholur í námunda við dalinn og beita svokallaðri skáborun, þar sem borað er á ská í háhitageyminn. Þetta er mun dýrara aðferð fyrir fyrirtækið, en er stór kostur með tilliti til umhverfismála.
Í Orkuveitunni eru margar borholur á sama borplani til þess að minnka jarðrask og borað á ská. Með því er hægt að auka nýtingu jarðhitasvæðisins.
Starfsmenn Orkuveitu Reykjavíkur nota svokallaða moldvörpu þegar grafa þarf fyrir lögnum. Moldvarpan er jarðbor sem hægt er að nota til þess að grafa göng í staðinn fyrir skurði og er þannig hægt að komast hjá miklu jarðraski.
Á Reykjum er Varmaá vernduð með því að hafa stillingar og yfirfall í þró þannig að heitt vatn fari ekki út í á og eyðileggi gróður og dýralíf.
Þegar grafið var fyrir kaldavatnslögn frá Grábrókarhrauni niður í Borgarnes var ákveðið að bæta úr gróðurskemmdum með því að útbúa svokallaðan mosagrógarð. Þá var mosaeyjum komið fyrir í hraunsári sem eiga að breiða úr sér og þekja að lokum jarðraskið.
Orkuveitan hefur hafið landgræðslu rétt hjá Þorlákshöfn til þess að stöðva sandfok.
Orkuveitan styrkir ýmis félög til þess að halda göngustígum við á útivistarsvæðum, t.d. á Hengilsvæðinu til þess að borgarbúar geti notið hreinnar náttúru í kringum Reykjavík.
Verði jarðraks vegna framkvæmda er það lagað eins vel og kostur er.
Hafsvæði
Hreinsun strandlengjunnar á höfuðborgarsvæðinu er sameiginlegt samstarfsverkefni fimm sveitarfélaga og hófst árið 1992. Þá gerðu Reykjavík, Garðabær, Kópavogur og Seltjarnarnes sameiginlegan samning um að búa til og reka holræsakerfi við Ægisíðu og Eiðsgranda. Mosfellsbær bættist svo við hópinn árið 2001.
Í framhaldi af hreinsun sjávar og strandlengju kostaði Orkuveitan ylströnd í Nauthólsvík þar sem borgarbúar geta baðað sig í heitum sjó á sumrin.
Fráveitan í Klettagörðum er nýbúin að fá vottun fyrir að framfylgja kröfum ISO 9001, ISO 14001 og OHSAS 18001. Þá er unnið eftir HACCP sem er líklega einsdæmi í heiminum, en HACCP er notað í olíuiðnaði og matvælaiðnaði.
Dýralíf
Tryggt er nægt vatn í Elliðaánum fyrir fiskgöngur með stýringu á rennsli.
Annað/almennt
Umhverfisskýrsla er gefin út einu sinni á ári þar sem er áhrif Orkuveitunnar á umhverfið eru metin.
Notkun umhverfisvænna efna er höfð í fyrirrúmi í Orkuveitunni og hafa öll merkingarskyld efni verið skráð og útvegaðar hafa verið öryggisleiðbeiningar fyrir þau. Um 1.800 efni eru í almennri notkun hjá fyrirtækinu og þar af eru rúm 1.400 merkingarskyld.
Öll orkuframleiðsla og neysluvatnsnotkun byggist á sjálfbærri framleiðslu. Sem þýðir að ekki er gengið á auðlindirnar meira en svo að þær endurnýjast þrátt fyrir nýtingu þeirra.
Sorp sem fellur til í starfsemi OR er flokkað eins vel og kostur og það endurunnið sem hægt er.
Öll spilliefni sem falla til eru send í eyðingu á viðurkenndum stöðum.
Eftirlit er haft með öllum olíu- og eldsneytisgeymum. Olíugildrur eru hafðar á þeim stöðum þar sem hætta er á að olíuefni geta farið út í umhverfið.
Stórar olíugildrur voru settar á athafnasvæði OR á Bæjarhálsi til að olíuefni berist ekki í umhverfið ef óhapp verður.
Áhættugreiningar eru gerðar á þeim stöðum þar sem talin er hætta á að starfsemin geti haft áhrif á umhverfið.
Orkuveitan hlaut Kuðunginn, umhverfisviðurkenningu Umhverfisráðuneytisins, árið 2005 fyrir starfsárið 2004.
Vegna umhverfisstefnu OR og vinnu undanfarin ár fékk fyrirtækið umhverfisvottun skv. alþjólega umhverfisstaðlinum ISO 14001 árið 2005. OR er eina orkufyrirtækið sem hefur hlotið þá vottun hér á landi.
Orkuveitan hlaut grænt vottorð frá TÜV í Þýskalandi vegna framleiðslu raforku með vistvænum hætti.
Orkuveita Reykjavíkur var fyrsta orkuveitan í heimi með innra eftirlitskerfi til að tryggja gæði og rekstraröryggi.
Orkuveitan hefur gefið út kort af gönguleiðum á landsvæðum sem eru í eigu fyrirtækisins þannig að almenningi gefist kostur á að skoða landið.
Orkuveitan tekur til sín fjölda ungmenna til sumarstarfa þar sem ungmennin fá fræðslu um umhverfis og öryggismál.
OR hefur staðið fyrir fræðslugöngum um náttúru og orkumál fyrir almenning.
Í allri starfsemi OR er gengið út frá umhverfismálum. – Orkuvinnsla í sátt við umhverfið
